Bleaching Hmong
Kev Tso Tshuaj Kom Dawb
California Dental Association
Qhov chaw tso siab tau los qhia txog kev kho hniav
Yog hais tias koj xav kom koj luag es muaj ib lo hniav ci thiab dawb, nrog koj tus kws kho hniav uas yog ib tus neeg koom hauv California Dental Association (CDA) tham es xyuas seb kev tso tshuaj kom dawb (bleaching) puas yog ib qho uas yog rau koj!
Yog vim li cas kuv cov hniav tsuas kob (discolored) thiab kev tso tshuaj kom dawb puas yuav pab tau?
Cov kev tsuas uas yuav tshem tau yooj yim tshaj tseem yog cov uas muaj heev tshaj. Cov no yog los ntawm tej yam sab nrauv, xws li haus khas fes los sis hauv tshuaj yej, thiab haus luam yeeb. Ntxiv thiab, cov hniav yuav dej zog tuaj thaum uas peb laus zuj zus vim qhov uas hloov hauv txhab hniav mos (dentin) (txheej uas nyob hauv qab ntawm txha hniav laus [enamel]) uas yuav pom tau los ntawm txheej txha hniav laus uas pom tshab. Kev tso tshuaj kom dawb mas nws yuav pab tau zoo tshaj thiab feem ntau pab tau cov kev tsuas uas zoo li no.
Lwm cov kev tsuas yog los ntawm tej yam sab hauv, xws li tsuas los ntawm kev siv tetracycline los sis siv fluoride ntau dhau heev lawm thaum lub sij hawm uas cov hniav tab tom tuaj. Qhov uas tsuas dub tsaus thiab tsuas dub dub los ntawm tej yam zoo li no mas yuav tso tshuaj kom dawb ib nyuag nyuaj zog.
Kev tso tshuaj kom dawb muaj dab tsi nyob rau hauv?
Muaj kev tso tshuaj kom dawb hauv qhov chaw kho hniav thiab ua tom tsev. Feem ntau cov khoom uas siv los ua kom dawb siv tib co tshuaj ua kom dawb, carbamide peroxide, txawm tias cov kua yuav sib txawv, nyob ntawm txoj kev siv thiab yam khoom uas siv ntawv.
Cov kev ua hauv chav kho hniav mas nws siv cov tshuaj ua kom dawb uas muaj zog dua thiab/los sis siv teeb los ua kom txoj kev tso tshuaj ua kom dawb ntawv nws ceev zog. Cov kev ua no nws ua kom tau ceev, tiam sis tseem yog txoj kev ua kom dawb uas kim tshaj plaws.
Cov kev ua tom tsev feem ntau nws siv ntau hnub mus rau ob peb plua (week) mas mam li ua tiav, uas siv sij hawm qeeb zog, feem ntau ua rau kom hloov ib qib zuj zus. Hom kev ua no, koj tus kws kho hniav uas yog ib tug neeg koom hauv CDA yuav yees duab ntawm koj lub qhov ncauj thiab ua ib lub tais los tuav cov kua uas siv los ua kom dawb ntawv. Koj yuav tau cov lus qhia rau txoj kev uas siv ntawv hais txog kev muab cov tshuaj tso rau hauv lub tais thiab seb yuav coj ntev npaum li cas rau ib zaug twg thaum ua kom dawb. Feem ntau, txhua lub sij hawm ntawv nws tsuas ntev li ntawm ob peb teev xwb.
Hos cov khoom uas siv los ua kom dawb thiab cov tshuaj txhuam hniav uas ua kom cov hniav dawb uas yuav tom khw los ne?
Txawm tias muaj ntau hom tshuaj ua kom dawb uas yuav tau tom khw los (over-the-counter [OTC]) uas lawv hais tias yuav ua kom koj cov hniav dawb los, txoj kev uas zoo tshaj los ua kom dawb yog los ntawm kev saib xyuas los ntawm koj tus kws kho hniav. Tej lub sij hawm, tej zaum yuav tsis pom zoo rau txoj kev tso tshuaj kom dawb, thiab koj tus kws kho hniav uas yog ib tug neeg koom hauv CDA yuav qhia tau seb txoj kev twg yog txoj uas yuav muaj kev ruaj ntseg thiab zoo tshaj. Ntxiv thiab, yam uas yog cov khoom ua kom zoo nkauj, OTC cov tshuaj ua kom dawb tsis muaj kev tswj li no nws tsis muaj kev saib xyuas los ntawm tsoom fwv tib yam li kev saib xyuas rau tej yam twj kho mob los sis cov tshuaj noj.
Yog hais tias koj txiav txim los siv OTC cov tshuaj ua kom dawb, cov uas ua los ntawm cov chaw loj uas nrov npe muaj keej khawm zoo hais txog kev ruaj ntseg thiab kev pab tau zoo, txawm tias lawv siv kua peroxide tsawg zog thiab qhov uas yuav pom tias zoo ntawv nws yuav siv sij hawm ntev dua cov khoom uas koj tus kws kho hniav uas yog ib tug neeg koom hauv CDA muab.
Rau cov kev tso tshuaj kom dawb uas yog OTC uas siv ib lub tais los tuav cov tshuaj uas siv rau kev tso tshuaj kom dawb, feem ntau lub tais ntawv nws tsis yog txiav kom haum es txaus los ntim cov kua kom tag thiab tiv thaiv kom nws tsis txhob ntws rau cov pos hniav los sis nqos tau.
Cov tshuaj txhuam hniav uas ua kom dawb feem ntau siv qhov ntxhib ntxhib los ua kom cov hniav huv – thiab dawb zog. Tiam sis, kev siv qhov uas muaj qhov ntxhib ntxhib no ntau ntau rau tus txha hniav laus feem ntau yuav ua rau kom tus txha hniav laus ntawv puas loj thiab tsis ci heev ntev mus. Yog hais tias siv cov khoom no, yuav tsum tau xyuam xim.
Yog hais tias lub tshuaj txhuam hniav muaj cov tshuaj peroxide rau kev ua kom dawb, lub sij hawm uas cov tshuaj txhuam hniav chwv cov hniav nws luv heev uas yuav ua rau txoj kev tso tshuaj kom dawb ntawv tsis zoo pes tsawg. Cov khoom no tej zaum feem ntau yuav siv tau zoo tshaj rau txoj kev ua kom cov kob dawb ntawv tsis txhob ploj thaum uas siv lwm txoj kev los ua kom nws dawb ua tau kom dawb.
Yuav tsum tau nrog koj tus kws kho hniav uas yog ib tug neeg koom hauv CDA tham ua ntej koj yuav siv ib qho khoom uas siv rau hniav uas yuav tom khw los kom paub tseeb tias nws yog ib qho uas yuav tsis phom sij thiab yuav zoo rau koj.
Puas muaj kev phiv tshuaj dab tsi rau kev tso tshuaj kom dawb?
Kev rhiab hniav me ntsis yog ib qho kev phiav uas muaj heev los ntawm kev tso tshuaj kom dawb. Yuav txo tau rhiab rhiab no los ntawm kev siv fluoride gels uas tus kws kho hniav sau ntawv los yuav, txawm tias tsis yog txhua tus neeg yuav siv qhov no. Rau cov neeg feem coob, qhov kev rhiav ntawv tsuas kav li ntawm ob peb hnub xwb. Koj tus kws kho hniav uas yog ib tug neeg koom hauv CDA yuav qhia tau rau koj seb yuav ua li cas yog hais tias koj cov hniav nws rhiab dhau heev lawm thaum uas tso tshuaj kom dawb.
Ntxiv thiab, cov kua tshuaj dawb ntawv yuav ua rau kom koj cov pos hniav mob, li no nco ntsoov so cov kua uas tshaj ntawv tawm. Kev siv cov tais uas yog cov tais txaiv kom haum thiab tsis txhob tso ntau tshaj qhov uas yuav siv yuav pab tiv thaiv tau kom tsis txhob phwj ntws rau sab nrauv.
Kev tso tshuaj kom dawb yog ib txoj kev ua uas zoo heev los ua kom cov hniav dawb rau ntau tus neeg. Tiam sis, koj cov hniav thiab cov pos hniav yuav tsum tau muaj kev kaj huv ua ntej yuav tso tshuaj kom dawb. Nrog koj tus kws kho hniav uas yog ib tug neeg koom hauv CDA tham es xyuas seb txoj kev ua kom cov hniav dawb twg yog txoj uas yuav muaj kev ruaj ntseg thiab yuav zoo tshaj rau koj!
800.CDA.SMILE
cda.org